KORONADAL CITY – Tuman ang kasubo sang mga himata sang isa ka 16 anyos nga dalagita makaligad naghikog sa boarding house sa Brgy. Zone 1, Koronadal City.
Isa sa mga ginalantaw nga motibo sang mga otoridad sa paghikog sang biktima amo ang problema sa kwarta.
Sa ekslusibo nga interbyu sang Bombo Radyo Koronadal sa iya utod, ginabulobanta nga yara sa P5,000 ang balor sang solicitation for graduation ang nadula.
Suno naman kay Ginang Alice, lola sang biktima, ginpahayag sini nga wala nagapakita sang patimaan ang biktima nga magahikog ini.
Nahibaloan nga gin-akigan pa ini sang iya iloy rason nga wala ini ginpadal-an sang kwarta kag ginapapangita ini sa iya.
Sa subong wala pa napahibalo sang pamilya sa iya iloy nga yara sa abroad ang natabo sa iya bata.
Samtang ginpasiguro naman sang Koronadal PNP sa pagpanguna ni P/Lt. Col. Benjiel Kirby Bajo nga wala sang foul play sa nasambit nga insidente.
