KORONADAL CITY- Nagapadayon pa ang imbestigasyon sang Koronadal City PNP angot sa isa ka fetus nga nasapwan sa Purok Pantua, Brgy. Zone 3,siyudad sang Koronadal.
Sa interbyu sang Bombo Radyo Koronadal kay Barangay Kapitan Bert Hinay sang Barangay Zone 3, isa ka construction worker ang nakadiskubre sang isa ka garapon nga may unod nga fetus.
Gilayon naman nga ginresponderan sang opisyal ang insidente kag nagpatawag sang kapulisan kun diin na-turn-over na ang fetus sa City Social Welfare and Development Office kag natalana nga ilubong.
Samtang, sa subong ginahibalo na kun sin-o ang iloy nga nag-abandonar sang fetus sa nasambit nga lugar.
Nagpanawagan naman si Kapitan Hinay sa mga kababaihan nga mangin responsible nga iloy agud nga indi na masulit pa ang nasambit nga insidente.
Nahibaluan nga subong nga tuig lang makapila ka beses nga natabo ang insidente sa pagbilin sang mga lapsag sa Brgy. Zone 3, Koronadal City nga ginkaalarma naman sang publiko.
