Nagpanumpa na si Donald Trump bilang ika-47 nga presidente sang Estados Unidos sang Amerika.
Ini ang nangin pahayag ni Mr. Peter Jabido- Bombo International Correspondent to US sa interview sang Bombo Radyo Koronadal.
Suno sa iya,ginpatigayon ang inagurasyon sa sulod sang US Capitol kun sa diin ang nag-administer amo si Chief Justice John Roberts. Antes kay Trump, una nga nagpanumpa ang iya vice president nga si JD Vance sang Ohio.
Suno sa incoming White House officials, madamo sang pirmahan nga executive orders sa una nga adlaw sang pagbalik sang 78-anyos nga Republican bilang presidente lakip na ang 10 nga nakatutok sa border security and immigration nga amo ang nagapanguna sa iya nga prayoridad.
Magadeklarar man ang presidente sang national emergency sa southern border, magapadala didto sang armado nga tropa, kag i-resume ang polisa nga magapwersa sa asylum seekers nga maghulat sa Mexico sang ila nga US court dates.
Tapuson man ni Trump ang birthright citizenship sa US-born children nga ang ginikanan wala sang legal status — isa ka tikang nga ginlaragway sang legal scholars nga ‘unconstitutional.’
Ang inagurasyon ni Trump nagamarka sang madinalag-on nga comeback sa pulitika matapos sini nalampuwasan ang duha ka impeachment trials, na-convict sa kaso-kriminal, na-indict sa tuyo nga baliskadon ang iya kalutusan sang 2020, kag nalampuwasan man sini nga duha ka assassination attempts.
Nagtambong sa kahiwatan sanday outgoing US President Joe Biden kag outgoing Vice President Kamala Harris kaupod sanday former presidents Barack Obama, George W. Bush kag Bill Clinton. Sa pihak nga bahin, yara man si former Secretary of State Hillary Clinton kag iya bana nga si Bill, apang wala naman nagtambong ang asawa ni Barack nga si Michelle.
Nakapwesto man sa entablado ang pila sa nagapanguna sa pinakamanggaranon nga tawo sa kalibutan nga amo sanday Tesla and SpaceX CEO Elon Musk, Amazon CEO Jeff Bezos kag Meta CEO Mark Zuckerberg. Ini nga tech executives ang gin-tupad sa cabinet members kag sa mga miyembro sang Trump family.
