Ginkondena ni Defense Secretary Gilberto Teodoro Jr. ang China Daily matapos ini magpagwa sang social media post nga nagalaragway sa mga Pilipino bilang mga amu may kaangtanan sa isyu sang arbitral ruling sa West Philippine Sea (WPS).
Suno kay Teodoro, ang nasambit nga post nagapakita sang pagtan-aw sang Chinese Communist Party (CCP) sa mga Pilipino kag isa ini ka porma sang pagkanubo kag propaganda batok sa Pilipinas.
Ginpaguwa ang kontrobersiyal nga post, duha ka adlaw antes ang ika-10 nga anibersaryo sang desisyon sang Permanent Court of Arbitration nga nagkilala sa katungod sang Pilipinas sa iya Exclusive Economic Zone (EEZ) sa West Philippine Sea.
Sa video, makita ang isa ka amu nga nagasuksok sang barong Tagalog kag salakot nga angay ginasugo sang mga karakter nga nagarepresentar sa mga Amerikano kag Hapon.
Ginpakita man ang amu nga ginabomba sang water cannon sa dagat matapos makabaton sang kopya sang arbitral award.
Suno pa kay Teodoro, isa ini ka pagyaguta sa 2016 Arbitral Award kag nagapakita sang pagpaubos kag pagpanakit sa mga Pilipino kag mga suldado.
Gintawag man niya ang post nga “contemptible propaganda” kag ginpahayag nga nagapakita ini sang wala sang China sang makatarunganon nga argumento sa isyu sang West Philippine Sea.
Samtang, ginkondenar man ni Philippine Coast Guard spokesperson for West Philippine Sea concerns Rear Admiral Jay Tarriela ang bisan ano nga porma sang racism, kag nagpahayag nga wala ini sang lugar sa subong nga panahon kag nga ang mga Pilipino indi amu.
