KORONADAL CITY – Natapos na ang distribusyon sang mga relief packs sa masobra 25,000 ka mga indibidwal nga nangin apektado sang El niño phenomenon.
Ini ang ginpahayag ni City Disaster Risk Reduction and Management Officer (CDRRMO) Cyrus Urbano sa interview sang Bombo Radyo Koronadal.
Suno kay Urbano, ang nasambit nga numero ang mga residente gikan sa 27 ka barangay kun diin kadam-an sa mga ini mangunguma kag mga laborer ukon nagatrabaho sa uma.
Una diri, naresolbar naman ang problema sa listahan sang mga makabaton sang relief goods ukon food packs sa Barangay Topland, ang nagaisahanon nga barangay nga nadelatar ang pagpanagtag sang ayuda.
Suno kay Urbano ginpadulungan sini mismo ang barangay Topland kag ginsapol ang mga Purok President kag Barangay Officials agud ipaathag ang guidelines nga dapat sundo sa listing sang mga indibidwala nga hatagan sang lima ka kilo nga bugas kag 6 ka delata kag noodles..
Aminado ang opisyal nga nakaangkon sang problema matapos nga may nagreklamo nga wala sila nalakip sa listahan kag may yara man sang nalakip sa listahan nga indi man mangunguma ukon laborer.
Gani suno kay Urbano, ginlimpyuhan kag gin-validate anay ang final list antes nga ginpatigayon ang pagpanagtag sang ayuda.
Magluwas sa Barangay Topland, may mga napagkit man nga gagmay nga mga problema kag wala paghangpanay sa iban nga mga barangay nga naresolbar naman.
Kaangot sini, nagapanawagan si Urbano sa mga residente sang 27 ka barangay sa siyudad nga hangpon ang sitwasyon bangud limitado lamang ang ginpain nga pundo para sa distribusyon sang food packs.
Kun may yara gid man sang deserving nga mangunguma ukon laborer nga wala malakip sa listahan magpalapit lamang sa ila nga talatapan agud ma-validate ini.
