KORONADAL CITY – Ginkasubo sang mga taga-South Cotabato ang balita nga pagkakas kay Secretary Ismael “Mike” Sueno bilang tiglikom sang Department of Interior and Local Government (DILG).
Sa interbyu sang Bombo Radyo Koronadal kay South Cotabato Governor Daisy Avance Fuentes, ginpahayag sini nga dismayado siya sa balita apang wala man sang may mahimo sa nangin desisyon ni Pangulong Rodrigo Duterte ang masunod.
Apang, nanindugan si Fuentes nga isa ka disente nga tawo kag indi kurakot si Sueno kasubong sang madugay na niya nga pagkakilala sa iya apisar indi sila magkapartido sadto.
Suno kay Fuentes, wala sang kamatuoran ang isyu sang korupsyon kag pag-abuso suno pa sa gahum batuk kay Sueno nga kahimuan sang tatlo ka DILG undersecretaries nga sanday John Castriciones (operations), Jesus Hinlo (public safety) kag Emilie Padilla (legislative liaison and special concerns) bangud sa ila nga wala paghangpanay humalin pa sang madesignar si Sueno sa posisyon.
Dugang pa ni Fuentes ang suno pa mga propreidad ni Sueno sa South Cotabato ang madugay na nga ginapanag-iyahan sang ila nga pamilya antes pa man ini magpungko sa pwesto.
Ang problema lamang suno opa kay Sueno bangud tuman ini kabuot kag indi makahibalo magpangindi labi na sa mga sitwasyon nga kinahanglan.
Samtang, wala man nagapati ang mga ordinaryo nga tawo nga nainterbyu sang Bombo Radyo nga nagapuyo malapit sa masobra 20 ektarya nga farm sang mga Sueno.
Suno sa ila, madugay na ang property sang mga Sueno kun diin makita ang malapad nga bebehan sini kag wala man sang ginaaligar mga heavy equipment didto.
Naobserbaran lamang ang on-going nga construction sang duha ka mga edifisyo nga dako ang posibilidad nga isa sa mga ginatumod sa mga akusasyon batuk sa iya.
