Indi magrekomendar ang Department of the Interior and Local Government (DILG) sang paglakip sa iban nga student-athletes halin sa Ateneo de Manila University men’s basketball team sa mga kasuhan kasunod sang pagkalumos-patay sang duha ka iban nga anay players.
Suno kay DILG Secretary Jonvic Remulla, biktima man sang mapintas nga training ang mga myembro sang Ateneo Blue Eagles.
Una na nga ginrekomendar sang Criminal Investigation and Detection Group (CIDG) ang pagpasaka sang kaso bangud sa gina-alegar paglapas sa Republic Act No. 11053, ukon ang Anti-Hazing Act, batuk sa 11 ka mga tawo may kaangtanan sa kamatayon nanday Rene Baterbonia kag Divine Adili sa isa ka team-building activity sa Dipaculao, Aurora.
Lakip sa mga ginrekomendar nga pasakaan sang kaso ang duha ka student managers kag duha ka ball boys.
Ginpasalig sang Ateneo nga nagpalapit na sila sa apat agud magtanyag sang suporta sa kabug-usan nga legal process.
Apang suno kay Remulla, mahimo pa nga mangin state witnesses ang apat kun matumod nga wala sila sang ihibalo sa delikado nga intension sang aktibidad.
Pahayag niya, ang prayoridad amo nga mapasabat ang coaches sang team, particular na ang head coach nga si Tab Baldwin.
