KORONADAL CITY – Desidido nga magpasaka sang kaso ang isa ka dalaga nga taga- Koronadal makaligad nga ginbuno ini sang iya nga kaugalingon nga amay sa ila mismo nga puluy-an sa bahin sang Barangay Sto. Niño, Koronadal City.
Ini ang nangin pahayag ni “Inday” 20-anyos, sa interview sang Bombo Radyo Koronadal.
Suno sa iya, desidido ini nga magpasaka sang kaso batok sa iya nga amay nga si Carlos Villalobos, 59-anyos makaligad ang nasambit nga panghitabo.
Dugang pa sini, nag-ugat nga ila nga baesanay sang iya nga amay makaligad nga nagmaoy ini nga masami niya man nga ginahimo sa tion nga maka-inom ini sang makahulubog nga ilimnon.
Nasabat sang biktima ang amay sini kabangdanan nga nag-init suno pa ang ulo sang suspek kag hinali nga ginbuno ang biktima.Makaligad ang pagpangbuno sang suspek sa biktima, gintilawan man sini nga utason ang iya nga kaugalingon nga kabuhi pinaagi sa pagsaksak sini sa iya nga dughan.
Madasig naman nga gindangat ang mag-amay sa balay-bululngan para sa medikasyon kag masuwerte naman nga yara na ang mga ini sa luwas nga kondisyon.
Ginpanginwala naman sang suspek ang alegasyon nga ginbuno niya ang bata sini kag ginpahayag nga nag-agaway sila sang kutsilyo kabangdanan nga naigo ang butkon sang biktima.
Nagpangayo man ini sang pasaylo sa iya nga bata bangud sa panghitabo apang desido naman ang bata sini nga magpasaka sang kaso batok sa iya nga amay nga masami nga naga maoy sa tion nga mahubog ini.
