KORONADAL CITY – Tuman nga kasubo ang nabatyagan sang pamilya Aguirre makaligad mapatay sa aksidente sa dalanon ang bata sang isa ka konsehal sa bahin sang Trinniville Block 2, Barangay Zone IV Syudad sang Koronadal.
Ginpahayag ni P/CPL Fely Bascon, Koronadal City Traffic Section, ginkilala ang biktima kay Joeneo Aguirre, 34 anyos, kag bata ni City Councilor Henry “Toto” Aguirre.
Sandig sa inisyal nga imbestigasyon sang City Traffic Section, may pagabaklon lang kuntani si Aguirre sakay sang iya motorsiklo apang samtang ginaasoy ang dalanon sa nasambit nga bahin, nabungguan isa ka bata nga babaye kabangdanan man nga nabunggo si Aguirre sa poste sang waiting shed kag naigo ang ulo sini.
Suno sa pila ka mga testigo, tuman suno pa kabaskog sang impact sa pagkabunggo sang biktima sa poste nga nangin rason sang iya kamatayon.
Sa subong, padayon naman nga gapaayo ang bata nga nabungguan sa isa ka balay bululngan diri sa syudad.
Panawagan naman sang opisyal nga kun mahimo maghalong sa pag drive sang motorsiklo agud malikawan ang kasubong nga aksidente.
