Ginpanginwala sang rookie player sang Ateneo de Manila University nga si Kieffer Alas ang nagalapta nga espekulasyon nga may kaangtanan sa hazing ukon initiation rites ang team-building activity kabangdanan sa trahedya nga nagresulta sa kamatayon nanday Divine Adili kag Rene Clert Baterbonia.
Suno kay Alas, wala sang kamatuoran ang mga akusasyon kag indi niya matuod nga mapaminsan sang ila mga beterano nga kagrupo nga sakiton siya ukon ang iban pa nga miyembro sang team.
Ginpahayag nila nga ang team-building sa isa ka resort sa Aurora kabahin sang ila preparasyon para sa UAAP Season 88 kag nagatuyo lamang nga mapabakod ang ila teamwork kag mental toughness.
Ginpakigbahin pa nila nga sila man ang na-anod sa dagat sang magluntad ang mabaskog nga balod sa dagat.
Antes sang aktibidades, ginpaklaro man sang mga coach ang mga risgo sang rip currents kag gintudlo ang dapat himuon kun ma-anod sang balon.
Pagkatapos sang insidente, nag-atras ang Ateneo Blue Eagles sa FilOil Preseason Cup, samtang ginbaton man sang Ateneo ang pag-resign ni head coach Tab Baldwin kag team manager Epok Quimpo sunod sa trahedya.
