Ginpahayag ni Violeta Constantino, anay department manager sang LandBank Shaw Boulevard Branch, nga naggamit sang tatlo tubtob apat ka dalpo nga bag nga kaangay sang gym bag ang mga representante sang Office of the Vice President (OVP) sa pagdala sang ₱125 milyon nga cash halin sa bangko.
Ang iya testimonya ginhatag sa ika-10 nga adlaw sang impeachment trial ni Vice President Sara Duterte, kun sa diin siya ang una nga testigo sang House prosecution para sa Article I sang impeachment complaint.
Ini nga artikulo may kaangtan sa alegasyon sang sala nga paggamit, pagpasaka sang pondo, kag indi regular nga liquidation sang confidential funds sang OVP kag Department of Education (DepEd).
Suno kay Constantino, siya mismo ang nagdumala sa pagpa-encash sang apat ka tseke nga may balor nga ₱125 milyon kada isa, ukon kabug-usan nga ₱500 milyon.
Ginpaathag niya nga ang kwarta ginpagwa halin sa back room sang LandBank bilang mga pakete nga may tag-₱1 milyon, antes ini ginbutang sa mga bag nga dala sang mga representante sang OVP.
Gindugang pa niya sa impeachment court nga ginadumdum niya nga mga tatlo tubtob apat ka bag ang gin-gamit sa pagdala sang amo nga kantidad sang cash.
Ang apat ka tseke ginpa-encash sang Disyembre 20, 2022; Enero 31, 2023; Abril 18, 2023; kag Hulyo 13, 2023, kag tanan ini nakapangalan kay Gina Acosta, ang special disbursing officer sang OVP.
