Wala napag-istoryahan ang padayon nga inaway sa Middle East sa nagluntad nga pulong ni Pangulong Ferdinand ‘Bongbong’ Marcos Jr. kag sang mga US Defense officials nga ginhiwat sa New York City, United States.
Suno kay Palace Press Officer kag Presidential Communications Office (PCO) Undersecretary Claire Castro, nakapokus ang pulong sa pagpalig-on sang Philippines–United States Defense Partnership kag indi sa sitwasyon sa Middle East.
Ginpahayag man ni Castro nga lakip sa gin-istoryahan sa meeting ang masunod nga Balikatan Exercises sa tunga sang militar sang Philippines kag United States, kag ang padayon nga pagpatuman sang Mutual Defense Treaty (Philippines–United States) sang duha ka pungsod.
Sang ginpamangkot kon may bag-o nga commitment ang Estados Unidos parte sa security support para sa Pilipinas, siling ni Castro nga nagapadayon ang saad sang Amerika nga ipadayun kag dugangan pa gid ang defense partnership sang duha ka pungsod sa idalom sang naga-iral nga kasugtanan.
Wala naman sang ginbahin nga dugang nga detalye ang Malacañang Palace kon may iban pa nga mga isyu nga natalakay sa amo nga pulong.
Sa amo nga pagbisita, nagpakigkita si Pangulong Marcos kay Eldridge Colby, U.S. Undersecretary of Defense for Policy, kag sa iya delegasyon sa New York City.
Sa ila pulong, gin-istoryahan ang pagpalig-on sang kapasidad sang duha ka pungsod sa paghadlang sang mga hulga sa Indo-Pacific region, kag man ang pagpaayo sang koordinasyon kag interoperability sa tunga sang Armed Forces of the Philippines kag militar sang Estados Unidos paagi sa magkasanib nga operasyon.
Gindugangan pa gid nga ginpabaskog liwat sang duha ka panig ang ila commitment sa Mutual Defense Treaty (Philippines–United States) kag ang padayon nga pagtinabangay agod mapabilin ang kalinong kag seguridad sa Indo-Pacific region.
