KORONADAL CITY – Natalana nga mag-abot buwas sang gab-i ang abyan kag confidant ni Jeanelyn Villavende nga si Roda Magtulis halin sa Kuwait.
Ini ang bag-o nga update nga ginpalab-ot sang nasambit nga OFW makaligad ulihi ini nga napabalita nga yara ini sa accomodation sang iya ahensiya antes ginsugat sang embahada sang Pilipinas agud makapauli diri sa Pilipinas.
Sa ekslusibo nga interbyu sang Bombo Radyo Koronadal, ginsaysay sini nga makapila siya ka beses nga nakatestigo pinaagi sa cellphone ang pagpang-abuso kag pagpanglugos sang iya amo nga babaye kag lalaki antes nila gindesisyonan nga patyon ini sang Disyembre 29.
Ginpaandaman naman siya sang iya amo nga mahimo siya mapreso kun indi niya ihaboy sa basurahan ang nasambit nga cellphone, butang nga gintuman naman niya ini.
Ini kuntani ang mangin ebidensiya nga igapresenta batok sa mga employer ni Villavende.
Samtang, ginpakigbahin man ni Roda nga nagapakita man suno pa sa iya ang kalag ni Jeanelyn kada adlaw kag nagapangayo ini sang hustisiya sa iya nadangtan.
Suno kay Roda, diri na lamang niya igabuyagyag sa Pilipinas ang tanan nga iya nabal-an labi na nga ginapangita siya sang mga otoridad didto sa Kuwait.
Tuman naman ang kalipay sang bana sini nga si Frank Libradilla sa balita nga pauli na ini sa Pilipinas kag nagpasalamat sa Bombo Radyo bangud wala ginpabay-an ang kahimtangan sang iya asawa.
