-- ADVERTISEMENT --

Naghatag sang katingala kag pagkadlaw sa mga pulis sa Florida, United States ang isa ka insidente sang pagsulod sa garahe sang residente nga ang nasakpan nga suspek isa gali ka baboy nga nagngalan Bacon.

Suno sa Casselberry Police Department sa ila social media post, nagresponde ang mga katapo sang Delta Squad sang Nobyembre 3 matapos makabaton sang report tuhoy sa isa ka intruder sa garahe sang residente.

Pag-abot sang mga pulis, ila nakita ang baboy nga nagapanago sa garahe sang kaingod nga propiedad. Nakilala ini nga si Bacon, nga nakapalagyo sa iya ginhalinan kag nakasulod sa nasambit nga lugar.

Suno pa sa kapulisan, wala gali nagapangita sang kinagamo si Bacon kundi pagkaon lamang sa ulihi nga oras sang gab-i.

Wala sang kaso nga ginpasaka batok sa baboy kag ginpauli ini sa iya tag-iya, upod ang isa ka warning.