Wala gihapon sang katapusan ang pagpangita sang pamilya ni late photojournalist Reynaldo Mumay sa kamatuoran kag hustisya, 17 ka tuig matapos nga nangin biktima ini sang 2009 Maguindanao massacre.
Sa interview sang Bombo Radyo Koronadal, ginpahayag sang iya bata nga si Ma. Reynafe Mumay-Castillo nga masakit para sa ila pamilya nga tubtob subong wala pa makita ang patay nga lawas sang iya amay kag wala sila sang kasiguruhan kon ano gid ang natabo sa iya.
Apesar narekober sa massacre site ang pila ka personal nga pagkabutang ni Mumay, lakip na ang dentures, jacket kag photography equipment, wala gihapon makita ang iya mga remains.
Mas nagdugang pa sa kasakit sang pamilya ang ruling sang korte sang 2019 nga nagresulta sa acquittal sa kaso nga may kaangtanan sa iya amay bangud sa kakulang sang ebidensya kag reasonable doubt, nga ginlakip sa mga rason ang indi pagkakita sa iya lawas.
Bangud sini, nag-file ang pamilya sang appeal sa Court of Appeals sang amo man nga tuig agud ipadayon ang ila pagpanawagan sang hustisya.
Suno kay Mumay-Castillo, ginpasaylo na niya sang 2011 ang mga responsable sa krimen, apang ginpahayag sini nga wala nagakahulugan nga untaton na niya ang pagpangayo sang hustisya para sa iya amay.
Para sa pamilya Mumay, ang pagpatawad indi katapusan sang ila pagpangita sang kamatuoran, labi na nga wala pa gihapon makita ang mga remains sang ila nga amay.













