Nag-atubangay liwat sanday US President Donald Trump kag Russian President Vladimir Putin sa China sa tion sang Asia-Pacific Economic Cooperation (APEC) forum, nga nangin isa sa mga talalupangdon nga hitabo sa pagtililipon sang mga lider sang nagkalainlain nga pungsod.
Nag-abot si Trump sa China sang gab-i sang Miyerkules, Nobyembre 18, kag ginsugata siya ni Chinese President Xi Jinping kaupod ang iya asawa sa airport.
Wala madugay, nagpalapit man si Putin kag nakig abi-abi sa lider sang Estados Unidos.
Ini ang una nga higayon sa pila ka tuig nga nag-atubang liwat sanday Trump kag Putin, kag nangin talalupangdon man ang ila pagtililipon upod kay Xi Jinping.
Ginapaabot nga mangin bahin sang ila mga diskusyon ang nagapadayon nga inaway sa Ukraine, tensyon sa Iran, paglapnag sang nuclear weapons, isyu sa kalakalan kag pag-uswag sang artificial intelligence (AI).
Ginalauman nga mangin oportunidad ang APEC forum agud mapalig-on ang pagbinuligay kag pag-istoryahanay sang tatlo ka gamhanan nga pungsod.
Madumduman nga ang ulihi nga pagkitaay nanday Trump kag Putin natabo sang Agosto 2025 sa Alaska, kun sa diin nagpatigayon sila sang pag-istoryahanay parte sa kinagamo sa Ukraine, apang wala nahingagaw ang ginalauman nga kasugtanan.







