Nagpatigayon sang apat ka hugna sang 2026 Renewable Portfolio Standards (RPS) On-Grid Conference ang Department of Energy (DOE) paagi sa Renewable Energy Management Bureau (REMB) bilang kabahin sang paninguha nga mapadasig ang paggamit sang malimpyo kag renewable energy sa Pilipinas.
Ginhiwat ang mga komperensya sa Baguio, Iloilo, Zamboanga kag Legazpi nga gintambungan sang kapin 300 ka mga representante halin sa mga distribution utilities, retail electricity suppliers kag generation companies.
Ginhimo ang mga pagtitipon agud mapalapnag ang paghangop parte sa pagpatuman sang RPS, mga regulasyon, pagbag-o sa merkado sang renewable energy kag mga ginapanugyan nga pagbag-o sa deadline sang pagsunod sa mga kinahanglanon.
Ginhisgutan man ang nagkalain-lain nga pamaagi kag instrumento nga makabulig sa pagplano sang suplay sang kuryente kag pag-integrate sang renewable energy sa operasyon sang tagsa ka kumpanya.
Kabahin sa resulta sang mga komperensya ang pagsumiter sang mga partisipante sang ila 2027 RPS Compliance Plans agud masiguro ang hapsay kag padayon nga paggamit sang malimpyo nga enerhiya sa pungsod.
Ginpahayag sang DOE nga importante ang pagbinuligay sang publiko kag pribado nga sektor sa pagpalig-on sang seguridad sa enerhiya kag pagpatuman sang mas malungtaron nga sistema sang kuryente sa Pilipinas.













