Nagpahayag sang pagkatingala si House Deputy Speaker kag Representative Janette Garin sa mga testimonya sang pila ka saksi nga ginpresentar sang kampo ni Vice President Sara Duterte sa nagapadayon nga impeachment trial.
Suno kay Garin, daw nangin mabudlay para sa pila ka testigo nga sabton kag depensahan ang mga isyu nga ginpabutyag sa ila sa tion sang pagpamangkot sang mga senador kag sang prosecution panel.
Ginpaathag sang mamalidha nga mabudlay mangin makatarunganon ang pagdepensa sa mga butang nga wala sang bastante nga paathag, gani nagpahayag man siya sang pagkaluoy sa mga testigo nga kinahanglan magsabat sa madamo nga pamangkot.
Dugang pa ni Garin, sa baylo nga makabulig sa depensa sang Bise Presidente, may mga testimonya pa gani nga suno sa iya daw nagdugang sang suporta sa mga ebidensya nga ginpresentar sang prosecution panel.
Bangud sini, ginpamangkot man niya kun nangin epektibo bala ang pagpili sang mga testigo sang depensa ukon sa baylo, mas naghatag pa ini sang dugang nga rason sa mga alegasyon nga ginapa-atubang kay Duterte.
Madumduman nga nagsugod ang presentasyon sang mga testigo kag ebidensya sang depensa sang Nobyembre 9, matapos matapos ang pagpresentar sang prosecution panel sang ila mga saksi kag ebidensya.
Ginalauman naman nga magapadayon liwat ang impeachment trial sa Nobyembre 19, 2026.
