Wala sang plano si Former South Cotabato 2nd District Representative Dr. Peter Miguel nga magbalik sa pulitika kag magdalagan bilang Gobernador sang South Cotabato sa masunod nga eleksyon.
Sa interview sang Bombo Radyo Koronadal, ginpaklaro ni Miguel nga naga-enjoy pa siya sa iya kabuhi nga malayo sa pulitika, ilabi na ang paghatag sang tion sa iya mga kabataan kag pamilya.
Ini ang iya sabat sa mga pumuluyo nga nagapabutyag sang handum nga makita siya liwat sa pulitika, lakip na ang mga nagapanugyan nga magdalagan siya sa pagka-gobernador.
Suno kay Miguel, opinyon lamang sang mga tawo ang amo nga mga panugyan kag wala pa siya sang desisyon nga magbalik sa pagserbisyo sa gobyerno paagi sa pagpangampanya.
Gindugang pa niya nga kon may yara siya sang plano nga magdalagan bilang gobernador, madugay na kuntani siya nga nagpreparar para sa amo nga posisyon.
Apang, sa karon, wala siya sang amo nga preparasyon bangud mas ginapili niya nga mag-enjoy sa iya kabuhi kag maghatag sang mas madamo nga tion sa iya pamilya.
