Ano ayhan ang imo nahimo sang tatlo ka tuig ka pa lang? Para kay Caleb Stewart, indi lamang paghampang kag pagtuon ang iya ginahimo kundi paghatag man sang inspirasyon sa iban pa nga kabataan.
Ginkilala sang Guinness World Records si Caleb, halin sa Florida, Estados Unidos, bilang pinakabata nga lalaki nga motivational speaker sa kalibutan.
Sa iya bataon nga edad, nagagamit na niya ang iya abilidad sa paghambal agud dasigon ang iban nga kabataan nga magtuo sa ila kaugalingon, maghandum sang mataas kag padayon nga magtuon.
Isa sa mga importante nga mensahe ni Caleb sa iya mga speech amo ang importansya sang pagbasa kag edukasyon sa pag-abot sang mga handum sa kabuhi.
Wala lamang siya nagapokus sa paghatag sang inspirasyon paagi sa paghambal bangod nagtukod man siya sang non-profit library nga ginatawag nga Master Caleb’s Discovery Library. Paagi sa sini nga inisyatibo, nagatinguha siya nga makahatag sang mga libro sa mga kabataan nga may limitado nga oportunidad sa pagbasa.
Sa likod sang iya mga nahimo amo ang padayon nga suporta sang iya pamilya, ilabi na sang iya lola nga nagabulig sa iya sa pagtuon kag pagpreparar sang mga mensahe nga iya ipaambit sa publiko.
Sa palaabuton, handum ni Caleb nga mangin maestro kag coach, kag magtukod sang iya kaugalingon nga eskwelahan agud mas madamo pa nga kabataan ang iya mabuligan.
Sa iya edad nga tatlo ka tuig, ginapakita ni Caleb nga ang edad indi balabag sa pagpaambit sang kaalam kag paghatag sang maayo nga impluwensya sa iban.
