Nagaplano ang administrasyon ni US President Donald Trump nga ipauli sa Afghanistan ang sobra 150 ka Afghan immigrants paagi sa Pakistan, bilang kabahin sang mas istrikto nga polisiya sang Estados Unidos batok sa imigrasyon.
Kaangot ini sang travel ban nga ginpatuman ni Trump sa pila ka mga pungsod, lakip na ang Afghanistan, kag sang plano nga untaton ang deportation protection para sa pila ka Afghan nationals.
Suno sa Afghan group nga AfghanEvac, lakip sa mga posible nga ipauli ang mga pamilya sang mga Afghan nga nagbulig sa militar sang Estados Unidos antes makontrol sang Taliban ang Kabul sang 2021.
Bangod wala direktang paagi ang US nga mapabalik ang mga ini sa Afghanistan, nagaplano ini nga makig-angot sa Pakistan agud manginway ang deportasyon.
May kaangtanan man ini sa nagalala nga relasyon sang Pakistan kag Afghanistan, matapos magpatuman ang Islamabad sang repatriation policy batok sa mga Afghan nationals nga wala sang balido nga visa.
Ginapaabot nga maglupad ang una nga flight nga magadala sa mga imigrante sa Lunes.
Samtang, bisan pa gin-anunsyar sang Taliban ang general amnesty para sa mga nagbulig sa mga pwersa kag gobyerno sang Western countries, nagrekord gihapon ang United Nations sang mga kaso sang abuso, krimen kag extrajudicial killings batok sa mga ini.
