Hindi pa rin natitikman ng Memphis Grizzlies ang pagkatalo matapos masungkit ang ikalimang sunod na panalo sa 2026-2027 NBA Season, kasunod ng dominasyon kontra Portland Trail Blazers, 124-103.
Naging susi sa panalo ng Memphis ang kanilang kolektibong opensa at depensa na tuluyang nagpahirap sa Portland, partikular na sa kanilang mga pangunahing scorer.
Isa sa mga naging sentro ng depensibong atensyon ng Grizzlies si Damian Lillard. Hindi naging maganda ang gabi ng beteranong guard matapos lamang makapagtala ng siyam na puntos mula sa 3-of-13 shooting sa field. Mas naging kapansin-pansin ang kanyang paghihirap sa three-point territory kung saan isa lamang sa siyam na pagtatangka ang pumasok.
Samantala, naging tampok naman ng panalo ang rookie forward na si Cameron Boozer na nagtala ng unang triple-double sa kanyang NBA career. Kumamada siya ng 18 puntos, 12 rebounds at 12 assists upang pangunahan ang balanseng opensa ng Memphis.
Hindi lamang si Boozer ang naging sandigan ng koponan dahil pito pang Grizzlies players ang nakapagtala ng double-digit scoring. Nagtala rin ng tig-18 puntos sina Isaiah Stewart at Boozer, habang nag-ambag naman si Cedric Coward ng 17 puntos.
Naging dikdikan ang unang bahagi ng laro matapos magtabla sa 58-58 ang dalawang koponan pagdating ng halftime. Gayunman, nagbago ang takbo ng laban pagsapit ng third quarter nang unti-unting makontrol ng Memphis ang kalamangan.
Lalong lumayo ang Grizzlies sa fourth quarter matapos makapagtala ng 33 puntos habang nalimitahan naman sa 20 puntos ang Portland.
Sa kabuuan, umiskor ang Memphis ng 66 puntos sa second half kumpara sa 45 lamang ng Trail Blazers, dahilan upang tuluyang maselyuhan ang kanilang 21-point victory.
Dahil dito, nananatiling walang talo ang Grizzlies sa 5-0 record, kasabay ng Houston Rockets na kabilang din sa mga koponang hindi pa nakararanas ng pagkatalo sa unang bahagi ng bagong NBA season.
