Ginatinguhaan sang Bureau of Internal Revenue (BIR) nga mapalapad ang tax relief program sini agud makabenepisyo man ang mas madamo nga gagmay nga negosyo, matapos makahatag sang kahigayunan sa 3,929 ka taxpayer nga makabuhin sang ila buhis kag multa nga nagabalor sa ₱266.79 milyon tubtob Oktubre 24, 2026.
Suno kay BIR Commissioner Charlito Martin R. Mendoza, nagapakita ang kadamuon sang mga nag-avail sa One-Time Abatement Program sa nagligad nga apat ka bulan nga epektibo ang amo nga tikang sa pagbulig sa mga negosyante nga maareglo ang ila mga obligasyon sa buhis kag masarhan ang mga kaso nga madugay na nga wala pa nahatagan sang solusyon.
Sa ginaplano nga pagpalapad sang programa, ginakonsiderar sang ahensya nga ilakip ang mga small taxpayer nga may tinuig nga gross sales nga ₱3 milyon tubtob mas manubo sa ₱20 milyon.
Sa subong, ang programa para lamang sa mga micro taxpayer nga may gross sales nga mas manubo sa ₱3 milyon.
Sa idalum sang yara na nga programa, nga bukas tubtob Disyembre 31, 2026, mahimo makapangayo sang abatement ang mga kwalipikado nga micro taxpayer nga may wala pa mabayaran nga base nga buhis ukon multa nga indi maglapaw sa ₱80,000 kada tuig, paagi sa pagbayad sang ₱5,000 nga abatement fee.
