Ginaobserbahan sang Simbahang Katolika ang All Saints’ Day sa Nobyembre 1 kag All Souls’ Day ukon Pyesta Minatay sa Nobyembre 2, nga may magkatuhay nga kahulugan kag katuyuan sa pagtuo.
Sa interview sang Bombo Radyo Koronadal, ginpahayag ni Bro. Paterno F. Corpus, FMS, University President sang Notre Dame of Marbel University, nga ang All Saints’ Day isa ka holy day of obligation para sa mga Katoliko, nga nagahatag sang kahigayunan sa mga tumuluo nga magtambong sa misa agud padunggan kag dumdumon ang mga santos nga yara na sa langit.
Suno kay Bro. Corpus, kinalain sang duha ka selebrasyon nga ang All Saints’ Day nagatutok sa pagpadungog sa mga santos, samtang ang All Souls’ Day nagahatag sang importansya sa pagpangamuyo para sa mga kalag sang mga nagkalamatay, lakip na ang ila mga miyembro sang pamilya kag mga hinigugma.
Dugang pa niya, sa pagsaulog sang All Souls’ Day, ginadumdom sang mga pamilya ang kabuhi sang ila mga pinalangga nga nagtaliwan na, lakip ang mga maayo nga handumanan kag mga nabilin nga leksyon sa ila kabuhi.
Ginpaathag man ni Bro. Corpus nga bisan magkalain ang kahulugan sang duha ka selebrasyon, pareho ini nga nagapahanumdom sa mga tumuluo sang importansya sang pagtuo, pagpangamuyo kag pagpadayon sa pagdumdom sa mga santos kag sa mga kalag sang mga minatay.
