Ginpabutyag sang Land Transportation Office (LTO) Region 12 nga madamo gihapon nga menor de edad ang nagamaneho sang salakyan ukon motorsiklo nga wala sang nagakaigo nga lisensya, base sa mga pagmonitor kag operasyon nga ila ginapatigayon sa dalanon.
Sa interview sang Bombo Radyo Koronadal kay Joceh Supa, team leader sang LTO-12, ginpahayag niya nga padayon ang ila pagpatigayon sang mga operasyon, lakip na ang Oplan Harabas, agud masiguro ang pagsunod sang mga motorista sa mga regulasyon sa dalanon kag mapauswag ang kaluwasan sang publiko.
Suno kay Supa, adlaw-adlaw ang ila pagpatigayon sang mga operasyon agud matalupangdan ang mga paglapas sa trapiko, lakip na ang pagmaneho sang mga menor de edad nga wala sang lisensya kag ang paggamit sang motorsiklo nga wala nagasuksok sang helmet.
Bangud sini, ginpahanumdom liwat sang LTO-12 ang mga motorista nga tumanon ang mga kinahanglanon antes magmaneho, ilabi na ang pag-angkon sang nagakaigo nga drivers license kag pagsuksok sang helmet para sa mga nagagamit sang motorsiklo.
Ginpahanumdom man ang publiko nga likawan ang pagmaneho kun wala sang husto nga mga requirements kasubong sang lisensya, agud malikawan ang insidente kag maproteheran ang kaluwasan sang tanan lakip na ang mga pedestrian.
