Gin-awhag ni Senate Minority Leader Alan Peter Cayetano ang iya mga kapareho nga senador nga temprano pa lang ipahayag na ang ila desisyon kon batunon ukon indi ang posisyon sang bise presidente, kun makakas sa puwesto si Vice President Sara Duterte paagi sa impeachment.
Ini matapos ginpahayag ni Senate Impeachment Court Presiding Officer Sen. Francis “Chiz” Escudero nga indi niya pagbatunon ang nasambit nga posisyon kon mapamatud-an nga guilty si Duterte sa impeachment trial.
Ginsuportahan ni Cayetano ang panindugan ni Escudero kag gin-awhag ang iban pa nga mga senador nga magpahayag man sang ila kaugalingon nga desisyon agud mangin maathag ang ila panindugan sa posibilidad nga mapilian sila nga magbulos sa posisyon.
Suno sa mga probisyon sang Konstitusyon, kon mabakante ang puwesto sang bise presidente, mahimo mag-nominar ang presidente sang isa ka membro sang Senado ukon House of Representatives bilang kapuli. Kinahanglan ini nga magsunod sa nagakaigo nga proseso kag makakuha sang kinahanglanon nga pag-aprubar sang Kongreso.
Sa pihak sini, nagpabilin nga importante ang papel sang mga senador sa impeachment proceedings batok kay Duterte, bangod sila ang magahatag sang desisyon base sa mga ebidensiya kag mga argumento nga ipresentar sang duha ka panig.
