Nagapati si Professor Danilo Arao sang University of the Philippines Diliman Department of Journalism nga ang bilang kag panindugan sang mga senador-judges mangin importante sa resulta sang impeachment trial batok kay Vice President Sara Duterte.
Sa interview sang Bombo Radyo Koronadal, ginpahayag ni Arao nga posible gihapon maluwas si Duterte sa impeachment kon magpabilin nga solid ang mga senador nga nagasuporta sa iya, bangud mas gamay nga boto ang kinahanglan para sa acquittal.
Suno kay Arao, mahimo man kwestyunon sang depensa kon ang mga iregularidad sa mga dokumento ukon transaksyon bastante nga basehan agud direkta nga pasakaan sang responsibilidad ang bise presidente.
Ginpahayag man niya nga importante nga bantayan sang publiko ang pag-uswag sang proceedings, ilabi na nga isa na lamang ka article of impeachment ang ginatalakay.
Ginalauman nga mahimo matapos ang proseso antes mag-Pasko, apang wala pa sang kasiguruhan sa eksakto nga tion sang desisyon.
Dugang pa ni Arao, indi lamang ang impeachment trial ang dapat tutukan sang publiko, kundi pati ang pagdumala sang national budget kag paggamit sang pondo sang gobyerno, nga halin sa buhis sang mga pumuluyo.
Gindungang niya ang importansya sang transparency kag accountability agud masiguro nga nagakadto sa husto nga paggamit ang kuwarta sang publiko.
