Nagdesisyon ang mga manug-atipan sang Lincolnshire Wildlife Centre sa England nga painagon ang lima ka African grey parrots matapos nga nakabatasan nila ang pagpamuyayaw kag pagkadlaw sa mga bisita nga nagakadto sa pasilidad.
Suno sa mga manug-atipan, nagsugod ang amo nga batasan nanday Billy, Eric, Tyson, Jade, kag Elsie sang nagaupod sila sa quarantine antes ibalhin sa ila permanente nga puy-an kag ipaupod sa iban nga mga pispis.
Namatikdan sang mga keeper nga kon magpamuyayaw ang isa ka loro, masunod dayon ang iban tubtob nga magkadlaw sila nga daw nagabinayloay sang ila ginahimo.
Mas nagadamo pa ang ila pagpamuyayaw kon makita nila nga nagakadlaw ukon natingala ang mga bisita sa ila ginahambal. Daw nangin makalingaw ini nga reaksyon para sa mga pispis, gani mas ginabalik-balik nila ang amo nga batasan.
Bangud sini, ginpili sang zoo nga painagon ang lima ka loro agud malikawan ang padayon nga pag-ilinawayay nila sang indi maayo nga mga pulong kag mapunggan ang posibilidad nga ini masundog sang mga kabataan nga nagabisita sa pasilidad.
