Ginpanawagan ni anay Department of the Interior and Local Government (DILG) Secretary Rafael Alunan nga maghingyo sang publiko nga pasaylo si Chinese Ambassador Jing Quan sa mga pumuluyo sang Pilipinas bangud sa iya kontrobersiyal nga pahayag kag ginapatihan nga pagpamahog.
Suno kay Alunan, kon indi magpangayo sang pasaylo ang Chinese envoy, dapat ini mapaalintunan ni Presidente Ferdinand Marcos Jr. bahin sa nagakaigo nga pamatasan kag pagtahod sa pungsod nga iya ginadestinohan.
Dugang pa sang anay kalihim, dapat kastiguhon sang presidente si Jing bangud sa iya pahayag nga ginahimo samtang yara ini sa teritoryo sang Pilipinas.
Ginpahayag man ni Alunan nga dapat konsiderahon ang pagpauli sa Chinese ambassador kag ang pag-recall sang Philippine ambassador sa China.
Ginsuhestyon man niya nga panubuon ang lebel sang diplomatiko nga relasyon sang duha ka pungsod.
Ginduso man niya ang pagrepaso kag posible nga pagtalikod sang Pilipinas sa One-China Policy, nga madugay na nga ginapabilin sang gobyerno sang Pilipinas.
Suno kay Alunan, dapat unahon ang prinsipyo sang pagtahod sa kaugalingon kag sa soberanya sang pungsod, kag indi dapat magpabilin nga wala sang sabat ang ginakabig niya nga pagpamahog.
Sa pihak sini, ang mga panawagan kag suhestyon ginpahayag ni Alunan bilang iya personal nga panindugan bahin sa nagadako nga tensyon sa diplomatiko nga relasyon sang Pilipinas kag China.
