Ginpabutyag sang Department of Justice ukon DOJ nga wala sang nagapugong ukon nagabalabag agoud mapasakaan sang kaso si Vice President Sara Duterte.
Suno kay Prosecutor General Richard Anthony Fadullon, wala sang balabag sa pagsaka sang kaso batok sa isa ka impeachable officer.
Ini amo ang panindugan sang DOJ bahin sa isyu kun mahimo bala nga mapasakaan sang kaso ang isa ka opisyal nga sakop sang impeachment.
Ini nga pahayag ginhatag matapos ginpahayag sang kampo ni Duterte nga indi kuno mahimo nga i-prosecute ang bise presidente samtang nagapadayon ang impeachment trial sa Senado.
Suno sa DOJ, separado ang proseso sang korte sa impeachment trial nga ginahiwat sa Senado.
Gani, ginpabay-an na sang departamento sa korte ang pagdesisyon kag pagresolba sang kaso batok kay Duterte.
Sang nagligad, pormal nga ginpasang-atan sang kaso sang DOJ si Vice President Sara Duterte sang kaso nga grave threats, nga may kaangtanan sa iya ginpahayag nga pagpamahog sa kabuhi nanday President Ferdinand “Bongbong” Marcos Jr., First Lady Liza Araneta-Marcos kag anay House Speaker Martin Romualdez.
Samtang, ginbasura naman sang DOJ ang inciting to sedition case batok sa bise presidente.
Ginpanindugan ni Fadullon ang amo nga resolusyon kag nagpahayag nga ebidensya ang ila ginbasehan.
Ini matapos pahayag ni Palace Press Officer Usec. Claire Castro nga kulang para sa iya ang kaso nga grave threats lamang nga ginpasang-at nga kaso batok kay Duterte.
Ginapaabot naman nga magsumiter ang DOJ sang komento sa motion to quash nga ginpasaka sang kampo ni Vice President Duterte, nga nagatinguha nga mapabasura ang kaso nga iya ginapangatubang.
