Nanawagan si Vice President Sara Duterte na higit pang paunlarin ang journalism sa Pilipinas, kasabay ng kanyang pananaw na mahalagang papel ang ginagampanan ng social media sa pagbibigay ng iba’t ibang pananaw sa publiko.
Sa panayam matapos ang kanyang pagbisita sa amang si dating Pangulong Rodrigo Duterte sa The Hague, sinabi ng Bise Presidente na may mga aspeto pa ng lokal na pamamahayag na maaari pang mapabuti. Aniya, mas nakita niya ang maayos na proseso ng pangangalap at paglalahad ng balita sa ilang international media organizations.
Inihayag ni Duterte ang pahayag bilang tugon sa tanong tungkol sa umano’y paglalathala ng ilang media outlet ng kanyang mga naging pahayag na aniya’y nailabas nang wala sa tamang konteksto, na nagdulot umano ng negatibong pananaw laban sa kanya at sa kanyang pamilya.
Binigyang-diin din niya na ang layunin ng pamamahayag ay hindi dapat nakasentro lamang sa kita. Ayon sa kanya, mahalagang manatiling nakatuon ang media sa pagbibigay ng makabuluhang impormasyon upang makatulong sa positibong pagbabago sa lipunan.
Kasabay nito, sinabi ni Duterte na nagsisilbi ring mahalagang alternatibong plataporma ang social media dahil nagbibigay ito ng pagkakataon sa publiko na makita ang iba’t ibang pananaw at bersyon ng mga pangyayari.
Sa huli, nagpahayag siya ng pangamba sa aniya’y nagbabagong pagpapahalaga ng ilang Pilipino at hinikayat ang publiko na patuloy na isabuhay ang mga pagpapahalagang tulad ng bayanihan, disiplina, at resilience.
