Ginpahayag sang PAGASA nga Southwest Monsoon ukon Habagat nga ginpabaskog sang Tropical Depression “Kiyapo” ang padayon nga mabaskog nga pag-ulan nga nagresulta sa pagsaka sang tubig kag pagbaha sa pila ka bahin sang Sarangani kag Syudad sang General Santos kag pila ka bahin sang Mindanao.
Sa interview sang Bombo Radyo Koronadal, ginpahayag ni Engr. Jaymar L. Artigas, Agricultural and Biosystems Engineer (ABE) sang Buayan – Malungon River Basin Flood Forecasting and Warning Center – Mindanao PAGASA Regional Services Division – Philippine Atmospheric, Geophysical and Astronomical Services Administration – Department of Science and Technology, nga ang mabaskog nga ulan natuga sang dako nga runoff ukon daludo sang tubig nga halin sa Makar Watershed, pakadto sa mga manubo nga lugar sang Syudad sang Heneral Santos.
Suno kay Artigas, bangud sang padayon nga pag-ulan sa kabukiran kag watershed areas, nagdamo ang volume sang tubig nga nagaawas sa mga suba, nga mahimo magresulta sa pagbaha sa mga low-lying communities ilabi na kun magpadayon ang pag-ulan.
Ginpahanumdom man sang PAGASA ang publiko nga padayon nga bantayan ang mga opisyal nga weather advisories kag flood warnings, ilabi na ang mga residente sa flood-prone kag landslide-prone areas, kag mangin preparado sa posible nga pagbakwit kun kinahanglan.
Ginpasiguro naman ni Artigas nga padayon ang monitoring sang PAGASA sa hulag sang Habagat kag Tropical Depression Kiyapo agud makahatag sang nagakaigo nga impormasyon sa publiko.
