Nagsaka pa ang kabug-usan nga utang sang gobyerno sang Pilipinas sa ₱18.55 trilyon sa katapusan sang Mayo 2026, base sa pinakabag-o nga datos sang Bureau of the Treasury (BTr).
Ini mas mataas sang 0.41 porsyento ukon dugang nga ₱76.1 bilyon kumpara sa ₱18.47 trilyon nga napagkit sang katapusan sang Abril 2026.
Suno sa BTr, ang pagsaka sang utang bangud sang mas agresibo nga domestic borrowings ukon pag-isyu sang government securities agud mapondohan ang nagkalain-lain nga programa sang gobyerno, bisan pa sa nagabag-o nga sitwasyon sang merkado tuga sang tensyon sa Middle East.
Ginpahayag man sang ahensya nga yara sa 68 tubtob 70 porsyento sang kabug-usan nga utang ang naghalin sa sulod sang pungsod, kasubong sang mga lokal nga bangko kag mamumuhunan, samtang ang nabilin amo ang mga utang halin sa guwas sang pungsod.
Bisan padayon nga nagasaka ang utang sang gobyerno kag ginapaabot nga malab-ot ang sobra ₱19 trilyon antes matapos ang 2026, ginpabutyag sang Bureau of the Treasury nga manageable ini kag mabayaran bangud sa padayon nga pagtubo sang ekonomiya sang Pilipinas.
