Ginpahayag sang Iran nga determinado ini nga depensahan ang iya nasyonal nga soberanya matapos ang panibag-o nga airstrikes sang Estados Unidos sa pila ka pasilidad sang surveillance kag pagmamanman sa habagatan nga baybayon sang pungsod.
Sa opisyal nga pahayag sang Iranian Foreign Ministry, mapintas nga ginkondenar ang pag-atake sang ila gintawag nga “terorista nga militar sang US” kag ginpabutyag nga padayon nila nga depensahan ang ila teritoryo batok sa bisan ano nga pagpanghilabot ukon pagpanalakay.
Samtang, nagapabilin nga maluya ang ceasefire deal sa tunga sang nagapadayon nga inaway sa Middle East, samtang padayon nga nagabinintinay ang Iran kag Estados Unidos sa ginapatihan nga paglapas sa kasugtanan.
Nagpaandam man si Foreign Minister Abbas Araghchi nga ang bisan ano nga pagpanghangkat sa kontrol sang Iran sa Strait of Hormuz magadala sang mas daku nga tensyon, labi na nga may nagapadayon nga negosasyon para sa kalinong.
Suno sa iya, ang bisan ano nga tikang sa pagpatuman sang separado nga kasugtanan nga wala nagasunod sa nagapadayon nga memorandum of understanding magapalala lamang sang sitwasyon kag makapauntat sa plano nga pagbukas liwat sang estratehiko nga Strait of Hormuz.
Nanawagan si Araghchi sa tanan nga panig nga magpabilin nga matutom sa kasugtanan kag indi pagpabay-an nga malihis ang proseso, kasunod sang panibag-o nga binayluhanay sang mga pag-atake sa nagligad nga duha ka gab-i.
