Ebidensya kag indi popularidad ang magadesisyon sa resulta sang impeachment trial ni Vice Presidente Sara Duterte.
Ini ang ginpabutyag ni House Committee on Higher and Technical Education Chair Jude Acidre sang Sabado, Mayo 30, nga naghatag sang ehemplo sa pagpahalin sa pwesto kay anay Presidente Joseph “Erap” Estrada sang 2001 agud ipakita nga bisan ang pinakasikat nga lider mahimo mapanabat kun ipakita ang mga ebidensya.
Suno kay Acidre, ginpamatud-an sang maragtas nga nagabag-o ang opinyon sang publiko kun mismo ang mga pumuluyo ang makakita sang kamatuoran.
Nagapati man ini nga bag-o ini nga pagtilaw sa kasamtangan nga henerasyon, apang natabo na ini sang una sa pungsod.
Ginpabug-atan niya nga ang hangkat subong amo ang pagpresentar sang ebidensya sa paagi nga mas madali maintindihan sang ordinaryo nga Pilipino agud makita nila ang ila papel sa isyu.
Dugang pa ni Acidre, bisan may nagkalain-lain nga pulitikal nga panan-aw ang mga Pilipino, nakahiusa gihapon sila sa pagpangita sang accountability kag maayo nga pang-gobyerno.
Ginpahinumdom man niya nga apsar ang mga politiko nga nag-upod kay Estrada sang una napanabat sang mga botante sa madason nga eleksyon matapos magbag-o ang desisyon sang publiko bangud sa ebidensya.
