Ginpasaka sang World Health Organization ukon WHO sa “very high” ang paglala sang outbreak sang Bundibugyo strain sang Ebola sa Democratic Republic of Congo.
Suno kay WHO Director-General Tedros Adhanom Ghebreyesus, nagpabilin nga mataas ang posibilidad nga mas tuman pa nga maglapta ang virus sa sulod sang pungsod, samtang “high” naman ang peligro sa rehiyon kag “low” sa pangkalibutanon nga lebel.
Ang Bundibugyo strain isa ka sahi sang Ebola nga wala pa sang aprubado nga bakuna ukon sigurado nga bulong sa kasamtangan.
Base sa pinakahuli nga datos, naglab-ot na sa 82 ang kumpirmado nga kaso sa Congo, lakip na ang pito ka kumpirmado nga napatay.
May yara man sang sobra 170 ka ginpatihan nga napatay kag halos 750 suspected cases nga padayon nga ginaimbestigaran.
Samtang, may yara na sang duha nga kumpirmado nga kaso sa Uganda halin sa mga biyahero nga naghalin sa Congo, kag isa sa ila ang napatay.
Suno sa WHO, nangin epektibo sa Uganda ang istrikto nga contact tracing kag pagkanselar sang dako nga mga pagtililipon agud mapunggan ang paglapta sang balatian.
Ginkumpirmar man sang WHO nga isa ka American national nga nagaobra sa Congo ang nalatnan sang virus kag gindala sa Germany agud magpabulong.
Samtang, ginatun-an man sang WHO ang pag-usar sang experimental antiviral drug nga Obeldesivir bilang posible nga pamatok sa Ebola, bisan kinahanglan pa ini gamiton sa idalom sang hugot nga protocol.
