Nagsiling si US President Donald Trump, nga ang bisan ano nga kasugtanan sang kalinong sa Iran kinahanglan wala sang nuclear weapons para sa Iran. Ginpaandaman man niya nga handa ang Amerika nga maglunsar sang “daku kag bug-os nga pag-atake” kon mapaslawan ang negosasyon.
Bilang sabat, ginpaandaman sang Iran ang US nga indi na maghimo sang “strategic mistakes,” samtang padayon ang ila pag-istoryahanay pinaagi sa mga mediator halin sa Pakistan.
Nagsugod ang inaway matapos ang air strikes sang Israel kag US kontra Iran sang Pebrero 28, nga ginsundan sang drone kag missile attacks sang Iran kontra Israel kag mga target sang US sa Gulf region.
Padayon nga nasunod ang ceasefire nga napagkasunduan sang Abril bisan may pila ka gamay nga pagbininauay.
Padayon man nga ginakontrolar sang Iran ang Strait of Hormuz, nga nagresulta sa pagsaka sang presyo sang petrolyo sa bug-os nga mundo.
Sa pihak naman, naganubo ang suporta sang mga Amerikano sa inaway.
Suno sa bag-o nga survey sang New York Times Siena, 64% sang mga botante ang nagapati nga sala ang desisyon nga maggira kontra Iran, samtang 37% lamang ang nagasuporta sa performance ni Trump bilang presidente.
Ginareport nga ginapangayo sang Iran ang pagtapos sang mga pag-atake, pagtangtang sang naval blockade sang US, sanctions para sa halit sang gyera, kag garantiya nga wala na sang masunod nga pag-atake.
Sa pihak naman, luyag sang US nga limitahan ang nuclear program sang Iran, lakip na ang pagnubo sang nuclear sites kag pagbalhin sang enriched uranium stockpile.
Sa bag-o nga pahayag ni Trump, ginpakita niya nga posible siya magsugot sa 20 ka tuig nga pagpauntat sang nuclear program sang Iran sa baylo nga bug-os nga pagsarado sini.
