Kumpiyansa ang Philippine Olympic Committee (POC) nga magapadayon ang paghakot sang medalya sang mga atleta sang pungsod nga nagasali subong sa Southeast Asian Games (SEA Games) sa Bangkok, Thailand.
Sa una nga adlaw pa lang sang kompetisyon, nakuha na ang duha ka gold nga medalya sang Pilipinas halin sa swimming kag taekwondo. Nanguna sanday Kayla Sanchez, Xiandi Chua, Chloe Isleta, kag Heather Santos sa women’s 4×100 meters freestyle relay sa sulod sang tatlo ka minuto kag 44.26 segundos.
Una nga nakab-ot ni Justin Kobe Macario sang taekwondo ang isa ka gold nga medalya matapos manguna sa men’s poomsae individual freestyle. Nautod niya ang pag panguna sang Singapore sa amo nga event nga ginahawiran nila sulod sang lima ka tuig. Nadumduman man nga ginsiling sang POC nga target nila nga makab-ot bisan ang ikaapat nga puwesto kag malabawan pa ang performance sang Pilipinas sang 2023 SEA Games.
