Ginpahayag sang Philippine Center for Investigative Journalism ukon PCIJ nga may bilyon-bilyon nga pondo nga ginatawag “allocables” kag “non-allocables” ang nakuha sang pila ka mga mambabatas sa Region 12 halin 2023 tubtob 2025.
Suno sa PCIJ, ang allocables amo ang bag-o nga porma sang pork barrel scheme, bisan pa gin-deklarar nga unconstitutional ang Priority Development Assistance Fund ukon PDAF sang 2013.
Sa karon, padayon suno pa ang mekanismo nga nagahatag sang discretionary funds sa kada distrito.
Ang allocable fund amo ang bahin sang national budget nga ginahatag direkta sa distrito sang kongresista agud ila magamit sa ila proyekto.
Samtang ang non-allocables naman amo ang pondo sang DPWH para sa mga core projects, big-ticket programs, national highways, foreign-assisted projects kag iban pa nga daku nga imprastruktura.
Apang suno sa PCIJ, madamo man diri ang indi klaro kon paano ginatunga kag ginahatag.
Ini nga impormasyon halin sa madalom nga imbestigasyon sang PCIJ, ang non-government organization nga naga-istorya kag naga-usisa sa nagakalain-lain nga isyu sa gobyerno, ilabi na subong nga nagasulput naman ang mga isyu sang korapsyon.
Bukas naman ang Bombo Radyo sa nasambit nga mga mamalidha kun luyag nila mag-eksplikar sang ila nga bahin.
