Personal nga nagtambong subong nga adlaw, Setyembre 16, 2025, si Bise Presidente Sara Duterte sa hearing sang House Committee on Appropriations angot sa P902.8 milyon nga budget sang Office of the Vice President (OVP) para sa tuig 2026.Ginhiwat ang deliberasyon sa Lower House, sa diin gin-istoryahan ang alokasyon sang pondo para sa nasambit nga opisina.Natalana ang hearing sang Setyembre 12, apang wala nagtambong ang Bise Presidente ukon bisan sin-o nga undersecretary halin sa iya opisina bangud na-reschedule ang sesyon.Sa pihak nga bahin, ginpadala man ni Duterte, suno sa iya, ang assistant secretary, apang wala ini ginbaton sang komite.Tradisyon sang Kamara nga ang nagpanguna o ulo sang ahensya, ukon isa ka undersecretary, ang magatubang sa budget hearing.Samtang ginpahayag sang OVP nga handa siya nga magtambong sang Setyembre 12, apang ginpayuhan sila sang budget sponsor nga indi magpadayon sa pag-attend matapos nahibaluan nga wala sang undersecretary nga magatambong sa amo nga hearing.Nagahingyo ang OVP sang P902.8 milyon nga pondo para sa tuig 2026 nga mas dako kun ikumparar sa P744 milyon nga alokasyon sa subong nga tuig (2025).Paga-usaron ang dugang nga pondo para sa pagpalapad sang mga programa kag serbisyo sang OVP.Amo ini ang una nga pagbisita ni VP Duterte sa Kamara halin sang Nobyembre 2024, sa diin iya gin-atubang ang mga isyu nga may kaangtanan sa ginaalegar nga pang-abuso sa pondo sang iya opisina.Nangin kabahin ini sang mga alegasyon nga ginbasehan sang impeachment case nga ginpasaka batok sa Bise Presidente.
