Isa ka indi ginpaabot nga insidente sa isa ka baybay sa Lake Michigan sa U.S. ang nagtuga, indi lang sang pagkaluwas sang isa ka lalaki sa kumunoy, kundi pati man sang pagsugod sang isa ka bag-o nga relasyon.
Samtang nagapanlakat kag nagapangita sang Leland blue stones sa Reynolds Street Beach sa Leland, Michigan, hinali lang nga nalubong tubtob sa hawak si Mitchell O’Brien matapos matapak sa isa ka bahin sang basa nga balas nga napamatud-an nga isa gali ka kumunoy.
Kaupod niya sadtong tion si Breanne Sika, isa niya ka kaupod sa trabaho.
Indi ini ang una nga bes nga nakasugata siya sang amo nga peligro sa Great Lakes, pero suno sa iya, ini ang pinaka seryoso.
Naglain nga nagtawag sang 911 sanday O’Brien kag Sika, kag amo to nga opisyal na nila ginpakilala ang isa kag isa bilang magkasintahan.
Gilayon nga nakaabot ang mga emergency responders kag maluwas nga nakuha si O’Brien halin sa kumunoy.
Base sa imbestigasyon, ang “quicksand” ukon kumunoy resulta ini sang hydraulic dredging sa lugar, kun sa diin ginkuha ang kapin 60,000 cubic yards sang balas halin sa idalom sang harbor.
Ginpahibalo sang mga otoridad nga delikado ang slurry nga nabilin halin sa dredging bangud posible ini magresulta sang pagguho ukon hinali nga pagkalubong.
Nagpamutang na ang Leland Township Fire Department sang mga babala sa palibot agud malikawan ang susunod nga pareho nga insidente.
