Igapresentar sang prosecution team ang inisyal nga written evidence nga may 8,565 ka pahina batok kay anay Presidente Rodrigo Duterte sa International Criminal Court (ICC).
Suno kay ICC Prosecutor Karim Khan, ang amo nga written evidence inisyal pa lang kag kabahin lang ini sang mga ebidensya nga igapresentar sa tion sang confirmation hearing.
Padayon pa nga ginarepaso sang prosecution team ang mga materyales nga ila pagagamiton antes ipresentar ang bug-os nga bulto sang ebidensya sa Pre-Trial Chamber.
Luwas sa mga sinulat nga dokumento, may ara man sila sang mga non-written evidence.
Suno kay Khan, may yara man sila sang visual kag audio-visual evidence nga ipresentar, nga sa subong naga-upod sang siyam ka mga laragway kag mga video footage nga magalawig sang 19 ka oras.
Sa Marso 21, una na nga ginpagwa sang prosecution ang 181 ka items nga nagalakip sang 2,787 ka pahina, kag nakabaton man sang kopya ang defense team sang anay presidente.
Suno pa kay Khan, ang pila ka mga items nga igapresentar mga non-witness documentary materials nga ginapaabot nga magaserbe sang importante nga papel sa tion sang confirmation hearing sa kaso batok kay anay Presidente Duterte.
