Kalaboso ang isang lalaki na itinuturing na High Value Individual kaugnay sa illegal na droga matapos marekober sa pag-iingat nito ang nasa Php182,000 halaga ng droga at mga baril sa Brgy. San Isidro, Sto. Niño, South Cotabato, nito lamang araw ng Martes, Enero 14, 2025.
Kinilala ni Police Major Raymon L Faba, Hepe ng Sto. Niño Municipal Police Station, ang arestadong indibidwal na si alyas “Bimboy”, 23-anyos, may asawa, negosyante, at residente ng nasabing lugar.
Ayon kay PMaj Faba, dakong alas-4:50 ng umaga nang isinilbi ng kanilang hanay ang search warrant laban kay Bimboy kasama ang iba pang mga kapulisan ng Police Regional Office 12 at South Cotabato Police Provincial Office, na siyang nagresulta sa pagkakaaresto ng suspek.
Narekober mula sa pag-iingat ng suspek ang nasa 52 gramo ng hinihinalang shabu na may standard drug price na Php182,000; isang yunit ng Homemade 12-gauge shotgun na may kasamang magazine; at isang yunit ng Cal. 45 pistol na baril na may kasama ring magazine at limang bala.
Samantala, ang nasabing personahe ay kasalukuyang nasa kostudiya na ng Sto. Niño MPS para sa kaukulang disposisyon at paghahanda ng mga dokumento para sa pagsasampa ng kaukulang kaso laban sa kanya.
