Gindepensahan ni Executive Secretary Lucas Bersamin ang tikang ni President Ferdinand “Bongbong” Marcos Jr. nga pahalinon sa National Security Council (NSC) si Vice President Sara Duterte.
Sa ginpatigayon nga Palace press briefing, ginpahayag ni Bersamin nga may kinamatarong kag responsibilidad ang Presidente nga siguraduhon nga ang sin-o man nga maglaygay sa iya yara sa sulod sang iya bug-os nga pagsalig.
Wala sang personal nga natabo sa desisyon ni Marcos suno kay Bersamin.
Ang Presidente nagpagwa sang Executive Order (EO) 81, nga nag-reorganize sang National Security Council. Ginpahalin sa amo nga mando si Duterte kag mga anay presidente sa komposisyon sang konseho.
Si Marcos nagsiling nga ang re-organisasyon nagatuyo sa pagsiguro nga ang National Security Council nagapabilin nga mapag-on kag mapasibu sa nagabag-o nga mga pagpanhangkat sa sulod kag sa luwas sang pungsod, nagapadaku sang importansya sang pag-amlig sang pungsodnon nga seguridad kag soberanya sa pagpasanyog sang epektibo nga pagdumala.
Sa pagdumdom, nangin mapait ang relasyon nanday Marcos kag Duterte apisar nga nangin tandem sa 2022 national elections.
Samtang, ginmulay man ni Bersamin ang anay chief presidential legal counsel nga si Salvador Panelo bangud sa pagsiling sini nga indi maayo ang desisyon ni Marcos kag naga-smack ini sang mahigko nga pulitika.
Ginpakamalaut man sini ang ginhambal ni anay tigpamaba sang presidente nga si Harry Roque, nga nagasiling nga ginakonsiderar kuno ni Marcos ang pagpatuman sang martial law nga ginaalegar nagtulod sa iya nga i-reorganize ang National Security Council.
