Magapatigayon si Miss Universe 2018 Catriona Gray sang fundraising event nga gintig-uluhan nga “Catriona Gray’s Legacy Ball” sa November 22 sa Parañaque City.
Ginalauman nga pagatambongan ini sang mga artista, mga socialites, models, influencers, kag mga dalagko nga mga personalidad.
Katuyuan sini nga ball nga makatipon sang pondo para sa Young Focus nga isa ka non-governmental organization sa Smokey Mountain sa Tondo, Manila.
Suno kay Catriona, excited sia bangud nga bisan nakahimo sia sang mga programa sini nga pandemya kaangay sang feeding programs, ginahandum niya ang mas dako pa nga event agud nga makabulig sia sa mas madamo nga mga tawo.
Nangin ally si Catriona sang Young Focus antes pa sia nga ginkoronahan bilang Miss Universe sang 2018.
Ginpakigbahin man ni Catriona nga ginapangluyagan niya ang mga brands nga iya ginaendorso kag ang mga Cornerstone artists kag beauty queens nga mag-donate ukon makigbahin sa iya nga ball.
Igapa-auction man sang Miss Universe ang pila sa iya nga mga fashion pieces nga nasuksok niya na sa nagligad nga mga tinuig. Ini agud nga makatipon sang mas madamo nga pondo para sa nasambit nga NGO.
