Gin-dismiss sang isa ka judge sa Georgia ang duha ka criminal counts sa US state 2020 election interference batok kay Republican presidential candidate Donald Trump kag isa pa ka kaso batok sa mga kaalyado sang anay presidente.
Nadiskubrehan sang Fulton County Judge nga si Scott McAfee nga wala sang otoridad ang state prosecutors sa pagdala sang mga charges nga may kaangtanan sa gin-alegar nga peke nga dokumento sa federal court.
Apang ginpahanugutan ni McAfee ang mga nabilin sa mga kaso nga magpadayon, kaangay sang walo ka charges batok kay Trump.
Si Trump kag ang 14 ka co-defendants ang nag-plead sang “not guilty” sa racketeering kag iban nga charges angut sa ginaduso sang mga prosecutors nga plano sang grupo nga baliskaron ang pagkapirde ni Trump sa Georgia sang 2020 elections.
Ang kaso gin-untat halin sang Hunyo samtang ginabinagbinag sang korte kon i-disqualify bala ang lead prosecutor nga si Fulton County District Attorney Fani Willis bangod sa gin-alegar nga misconduct nga naangot sia sa isa ka romantic relationship sa isa ka anay top deputy.
Ang mga argumento sa court of appeals nakatalana sa Disyembre, ini ang nagakahulugan nga ang kaso indi mag-uswag antes ang Nobyembre 5 nga eleksyon kon sa diin maatubangay sanday Trump kag Democratic Vice President Kamala Harris.
Nahibaluan man nga may yara sang separate federal case si Trump nga ginpahinay sang US Supreme Court bangod sa ruling nga ang mga presidente may yara sang ginatawag nga “broad immunity” sa criminal prosecution.
Nagapalibot ang desisyon sa alegasyon kon sa diin si Trump kag iya mga kaalayado ang nagtipon sang mga “fraudulent presidential electors” para magpasaka sang civil lawsuit nga nagahangkat sang nasambit nga election results.
Ginpakita sang ruling nga wala na sang merito ang lima sa 13 ka original criminal counts batok kay Trump halin sa indictment nga ginkuha sang nagligad nga tuig. Sang Marso, gin-dismiss man ni McAfee ang anom ka counts, lakip diri ang ginpasaka nga tatlo para kay Trump.
Suno sa abogado ni Trump nga si Steve Shadow, ang ruling nagapakita nga si Trump kag iya legal team ang liwat nga nangibabaw.
Samtang ang spokesperson ni Willis wala gilayon magsabat sang ginpangayuan sang komento.
Sa separado nga desisyon, ginduso ni McAfee ang primary charge nga racketing nga ginpasaka batok sa tanan nga defendants.
