Yara na sa kustodiya sang mga otoridad ang anay Negros Oriental governor Pryde Henry Teves, ang utod ni expelled Negros Occidental Congressman Arnolfo ‘Arnie’ Teves.
Si Teves ang gin-aresto alas-8:15 kaina sang aga sang Philippine National Police – Criminal Investigation and Detection Group (PNP-CIDG) sa Barangay Taclobo, Dumaguete City bangod sa pagbayolar sa The Terrorism Financing Prevention and Suppression Act of 2012.
Ang warrant of arrest ang gin-issue sang Seventh Judicial Region, Branch 74 – Cebu City sang Mayo 13 kag ini ang gintanyagan sang bail nga P200,000.
Ang anay gobernador ang nagapanguna sa listahan sang mga Most Wanted Persons (MWP) sa provincial kag regional level.
Madumduman nga sang Agosto tinalikdan nga tuig, gindesignar sang Anti-Terrorism Council (ATC) si Pryde Henry kag magulang sini nga si expelled Negros Occidental Congressman Arnolfo ‘Arnie’ Teves, kaupod ang 12 ka iban pa bilang terorista bangod sa gina-alegar kaangtanan sang mga ini sa pila ka insidente sang pagpamatay kag harrassment sa Negros Oriental.
Kalakip diri ang pagpatay kay late Negros Oriental Governor Roel Degamo sang Marso 2023 nga nagresulta sa pagkapatay sang siyam ka iban pa.
Una naman nga ginpagwa ang arrest warrant batok kay Arnie Teves sang Setyembre tinalikdan nga tuig, nga sa karun ginpaidalum sa house arrest sa Timor Leste samtang ginaproseso ang extradition trial agud ini ang mapabalik sa Pilipinas.
