KORONADAL CITY – Ginbawian sang kabuhi ang isa ka indibidwal matapos ngamakuryente sa kasagsagan sang baha sa Barangay Polayagan, Alamada, Cotabato.
Ini ang ginkumpirmar ni OCD 12 Information Offcier Jorie Mae Balmediano sa interview sang Bombo Radyo Koronadal.
Suno kay Balmediano, bangud sa kabaskugon sang ulan madasig nga nagsaka ang lebel sang tubig sa ila lugar kag wala mahingagaw nga mapatay nag kuryente.
Ginkilala ang biktima nga si Gino Alolino, yara sa legal nga edad kag residente sang nasambit nga lugar.
Sandig sa report, handa kunati nga patyuon ni Alolino ang plangka sang ila kuryente apang natandog sini nag wire kag nakuryente.
Nadala pa ini sang nagresponder nga mga katapu sang MDRRMO kag BFP apang wala na nabulong pa kag ginbawian sang kabuhi.
Bangud man sa natabo nga baha, madamo sang mga ginpangbakwit samtang madamo nga mga motorista man ang nagkala-stranded.
