KORONADAL CITY – Naglab-ot sa apat ka mga banwa sa probinsiya sang North Cotabato ang apektado sang buhawi, flash flood kag landslide sa pila ka adlaw nga pagbuhos sang mabaskog nga ulan.
Ini ang ginpahayag ni Engr. Arnulfo Villaruz, chief for operations sang PDRRMO-North Cotabato sa interview sang Bombo Radyo Koronadal.
Suno kay Engr. Villaruz, sa pagpanalasa sang buhawi naglab-ot sa 339 ka mga puluy-an ang naguba sa M’lang samtang siyam (9) ka panimalay naman sa banwa sang Tulunan.
Sa karon ginahibalo pa kun pila ang partially ukon totally damaged sa nasambit nga mga panimalay.
Sa pihak nga bahin, apektado naman sang flash flood kag landslide ang banwa sang Magpet.
Dugang pa ni Villaruz, naguba sang landslide ang kilid sang Magpet river bangud sa kabaskog sang current sang tubig kun diin may isa ka puluy-an man nga naapektuhan.
Samtang, apektado man sang baha ang pila ka bahin sang banwa sang Kabacan.
Wala naman sang may napagkit nga casualties sa pagpanalasa sang kalamidad.
Padayon naman nga nagapahanumdum ang PDRRMO-North Cotabato sa mga pumuluyo sang nasambit nga probinsiya nga maghalong kag mangin alerto sa tanan nga tion ilabi na nga may ginabantayan naman nga Low Pressure Area (LPA).
Samtang, sa karon, nagapadayon pa ang damage assessment sang nasambit nga ahensiya sa mga naapektuhan sang kalamidad .
