KORONADAL CITY – Nakaangkon sang bali kag pilas sa nagkalain -lain nga bahin sang kalawasan ang isa ka sundalo makaligad nga maulamid ini sa isa ka disgrasya sa dalanon sa bahin sang Gensan Drive.
Ini ang gin kumpirmar ni PSSgt. Henry Felix, Koronadal City PNP-Traffic Section Investigator sa interview sang Bombo Radyo Koronadal.
Ginkilala sini ang biktima nga si Rotchie Sadang, nga nak destino sa 512th Engineer Construction Batallion, 52nd Engineer Brigade sa Zambaonga City.
Sandig sa imbestigasyon nga gin hiwat sang mga otoridad, gina-asoy ni Sadang ang kalabaon sang Gensan Drive sakay sang isa ka motorsiklo sang aksidente ini nga nabangga sini ang isa ka paliko nga Truck nga ginamaneho naman ni Vic Domingo.
Sa kabaskog sang impact sang pagbangga-anay, wasak ang atubang nga bahin sang motor ni Sadang kag natumba ini sa tunga sang sementado nga dalan kag nakaangkon sang mga pilas sa kalawasan.
Madasig naman nga nagresponde sang mga katapo sang rescue team sng BFP Koronadal kag gindangat ang biktima sa pinakamalapit nga balay-bululngan.
Sa subong nagapadayon na ang imbestigasyon sang mga otoridad sa nagluntad nga aksidente.
